Gautami Deshpande and Swanand Tendulkar Marriage : सिनेसृष्टीत सध्या लग्नाचे वारे वाहू लागले आहेत. एकामागोमाग एक कलाकार जोड्या लग्नबंधनात अडकत आहेत. अशातच ‘सारे तुझ्याचसाठी’, ‘माझा होशील ना’ फेम अभिनेत्री गौतमी देशपांडे लवकरच विवाहबंधनात अडकणार आहे. स्वानंद तेंडुलकर बरोबर असलेल्या रिलेशनशिपमुळे मध्यंतरी गौतमी चर्चेत आली होती. मात्र तिने तिच्या नात्याचा जाहीर खुलासा केला नाही. त्यानंतर गौतमीची बहीण मृण्मयीने सुरु केलेल्या तयारीवरुन लग्नाची कुणकुण लागून राहिली होती.
अखेर काल गौतमीने तिच्या मेहंदी समारंभाचं औचित्य साधत सोशल मीडियावरुन होणाऱ्या नवऱ्याबरोबरचे फोटो शेअर करत प्रेमाची जाहीर कबुली दिली. ही प्रेमाची कबुली देताच गौतमी व स्वानंदच्या नात्याबाबतच्या चर्चांना पूर्णविराम मिळाला आहे. आता लवकरच ही जोडी बोहोल्यावर चढणार आहे. मृण्मयीने बहिणीच्या संगीत सोहळ्याची तसेच केळवणाची तयारी करतानाचे व्हिडीओ शेअर केले होते. त्यानंतर गौतमीच्या मेहंदी सोहळ्यातील फोटोही सोशल मीडियावर वाऱ्यासारखे पसरले.
मेहंदी सोहळ्यासाठी गौतमीच्या खास लूकचं सर्वत्र कौतुक होताना पाहायला मिळालं. गौतमीने गुलाबी रंगाचा लेहेंगा परिधान केला होता. यांत तिचं सौंदर्य खुलून आलं होतं. तर स्वानंदने गौतमीच्या लेहेंग्याच्या रंगाला साजेसा गुलाबी रंगाचा जॅकेट आणि पांढऱ्या रंगाचा कुर्ता परिधान होता. दोघांचा मेहंदी सोहळ्यातील हा लूक चांगला चर्चेत आला आहे. दरम्यान, या सोहळ्यात गौतमीची मोठी बहीण मृण्मयी देशपांडेच्या लुकचीही चर्चा झाली. मृण्मयीने बहिणीच्या मेहंदी समारंभात खणाचा ड्रेस परिधान केला होता.
गौतमीच्या मेहंदी सोहळ्यात डान्स करतानाचा एक व्हिडीओ सोशल मीडियावर चांगलाच व्हायरल झाला आहे. व्हायरल व्हिडीओमध्ये गौतमीसह मृण्मयी जबरदस्त डान्स करताना दिसत आहे. तसेच त्यांचे इतर कुटुंबीयही थिरकताना पाहायला मिळत आहेत. समोर आलेल्या व्हिडीओमध्ये गौतमीच्या मेहंदीला मृणमयी भाव खाऊन गेली आहे. दोघी बहिणींचा धमाल मस्ती करत ठेका धरतानाच्या व्हिडीओने साऱ्यांचं लक्ष वेधून घेतलं आहे.
