Vaishnavi hagawane death case : वैष्णवी हगवणे आत्महत्या प्रकरणाला एक वेगळंच वळण आलं आहे. या प्रकरणाने आता न्यायालयाची पायरी चढली असून आरोपींच्या पोलीस कोठडीत वाढ झाली आहे. दरम्यान, आरोपी हगवणेंच्या वकिलाने वैष्णवीच्या चारित्र्यावर शंका घेत बेधडक आरोप केले. एका अज्ञात व्यक्तीबरोबर तिचे चॅटिंग सुरु होते असा संशय हगवणेंना आला होता. यावरून वैष्णवी आणि तिच्या पतीमध्ये वाद सुरु होता. त्यातूनच हा वाद झाला असून त्यातच तिने आत्महत्या केल्याचं हगवणेंच्या वकिलांनी म्हटलं. आता वैष्णवीच्या वडिलांनी पत्रकार परिषद घेऊन हे सर्व आरोप फेटाळून लावले आहेत. तसेच, माझी मुलगी तर गेली, आता तिच्या चारित्र्यावर शिंतोडे उडवू नका, अशी कळकळीची विनंती वैष्णवीच्या वडिलांनी हात जोडून केली.
वैष्णवीचे वडील माध्यमांबरोबर बोलताना म्हणाले की, “हुंड्यासाठी छळ केला नाही म्हणता, गाडी मागितली नाही म्हणता. पण, हगवणेंना फॉर्च्यूनर देण्याअगोदर मी एमजी हेक्टर ही गाडी बुक केली होती. मला फॉर्च्युनर नाही दिली तर मी यांची एम जी हेक्टर पेटवून देईन, असं सांगण्यात आलं. हीच गाडी पाहिजे असा हट्ट केला होता म्हणून आम्ही फॉर्च्युनर दिल्याचं वैष्णवीच्या वडिलांनी सांगितलं. आरोपीकडे पाच कोटींच्या गाड्या नाहीत, त्याच्याकडे एकच गाडी आहे तीही मी दिलेली”.
आणखी वाचा – भारती सिंहची तब्येत बिघडली, रक्त तपासणी करताना घाबरली अन्…; नेटकरी म्हणाले, “करोना तर…”
पुढे ते म्हणाले, “माझ्या मुलीची अगोदरच दोन लग्न मोडली होती, गाडी न दिल्यास लग्न मोडण्याची धमकी दिल्यामुळे मी फॉर्च्युनर दिली. माझ्याकडे गाडी, चांदीच्या ताटाची मागणी, सोन्याची मागणी तसेच अधिक महिन्यात इतरही मागण्या करण्यात आल्या. माझ्या मुलीचे दोन लग्न मोडली त्याला हगवणे कुटुंब जबाबदार आहेत”, असेही वैष्णवीचे वडिल अनिल कस्पटे यांनी म्हटले.
पुढे ते म्हणाले, “त्यांच्या वकिलांनी केलेल्या मुद्द्यावर मला असं बोलायचं आहे की, त्यांनी केलेलं कृत्य आणि माझ्या मुलीचा घेतलेला बळी याला कुठेतरी त्यांना वेगळी कलाटणी द्यायची आहे, म्हणून ही दिशाभूल करण्याचा प्रयत्न केला आहे. हे चॅट प्रकरण जे आता काढण्यात आले आहे त्याबद्दल आम्हाला पुसटशी माहितीही दिली नाही. माझी मुलगी तर आता गेलीय, वैष्णवीवर आता काहीही आरोप करुन शिंतोडे उडवू नका, अशी हात जोडून विनंती वैष्णवीच्या वडिलांनी पत्रकार परिषदेतून केली. पत्रकार परिषदेत वैष्णवीच्या वडिलांना अश्रू अनावर झाले. तुम्हाला ही मुली असतील, तुम्ही सर्वांनी हा विचार करावा, तुम्हालाही मुली असतील, पण एखाद्या लेकराबाबत असं नका बोलू, अशी कळकळीची विनंती त्यांनी भरल्या डोळ्यांनी करत हात जोडले.
