Shashank Ketkar Video : सोशल मीडियावरील अनेक सामाजिक विषयांवरील व्हिडीओमुळे नेहमीच चर्चेत असणारा अभिनेता म्हणजे शशांक केतकर. शशांक नेहमीच त्याच्या सोशल मीडियावर सामाजिक मुद्द्यांवर भाष्य करताना दिसतो. याआधीही शशांकने अनेकदा रस्त्यावरील कचऱ्याबाबत व्हिडीओ बनवून पोस्ट केले. इतकंच नव्हे तर अभिनेत्याने बनवलेले हे व्हिडीओ पाहून प्रशासनाने दखल घेत त्या ठिकाणचा कचरा उचलला असल्याचे पाहायला मिळाले. शशांक सोशल मीडियावर नेहमीच सक्रिय असतो. नेहमीच तो काही ना काही शेअर करत चाहत्यांच्या संपर्कात राहत असतो. अशातच अभिनेत्याने पुन्हा एकदा फिल्मसिटी येथील कचऱ्यामुळे घाणेरड्या झालेल्या ठिकाणाचा थेट व्हिडीओ शेअर करत त्याने एक व्हिडीओ पोस्ट केला आहे.
शशांकने इंस्टाग्राम अकाउंटवर व्हिडीओ शेअर करत असं म्हटलं की, “फिल्मसिटीचा प्रवेश कधीच मला दुखावत नाही. कचरा उचलणाऱ्या या मातेला आणि उकिरड्यावर असणाऱ्या या राजमातेला वंदन करुन फिल्मसिटीच्या थोडं आत जाऊया आणि बघूया आणखी थोडा कचरा. फिल्मसिटीच्या आत असलेल्या ओल्या कचऱ्याच्या या पेट्या आहेत आणि यांत सुका कचरा आहे, कदाचित या प्लास्टिकच्या पिशव्या ओल्या असाव्यात. कचरा बघितलात. हास्यास्पद आहे ना. मागच्या वेळी मी एक व्हिडीओ पोस्ट केला होता आणि त्या व्हिडीओनंतर BMC ने दाखल घेतली. त्यानंतर मी फिल्मसिटीमध्ये जवळपास १५ वेळा तरी आलो असेल, परिस्थिती जैसेथे आहे”.
पुढे त्याने असं म्हटलं की, “खूप वाट पाहिली पण काहीच फरक पडला नाही म्हणून आज हा पुन्हा व्हिडीओ करतोय. प्रत्येक भागात कचऱ्याच्या पेट्या आहेत, पण इतकं करुन मोकळे होऊ नका. आपली लोकसंख्या खूप आहे त्यामुळे कचरा खूप होणार आहे. त्यामुळे खूप घाणेरडी ठिकाणं असणार आहे आणि त्या ठिकाणी अशी दोन-चार तुटलेले डबे ठेवण्यापेक्षा जितकी लोकसंख्या, जितका कचरा, जितकी ठिकाणं त्या ठिकाणी कचरा गोळा करायला सामग्री ठेवा”.
आणखी वाचा – एक तप पूर्ण ! लग्नाला १२ वर्ष पूर्ण होताच हेमंत ढोमेची बायकोसाठी खास पोस्ट, म्हणाला, “पाटलीणबाई…”
शशांकने हा व्हिडीओ शेअर करत त्याखाली कॅप्शन देत असं म्हटलं की, “मला कल्पना आहे की, हे एकच ठिकाण नाही तर संपूर्ण महाराष्ट्रात अशी हजारो ठिकाणं आहेत जिथे कचरा जमलेला असतो. बदलाची सुरवात ही छोट्या छोट्या गोष्टींमधूनच होत असते. जर BMC आणि कचरा टाकणारी जनता निर्लज्ज आहे तर मग मलाही निर्लज्जा सारखं हे पुन्हा पुन्हा निदर्शनास आणून द्यावं लागणार. मी व्हिडीओ बघणाऱ्या जनतेलाही हेच सांगेन, सहन करु नका. कचरा दिसेल तिथे व्हिडीओ शूट करुन तुमच्या महानगरपालिकेला टॅग करा. निदर्शनास आणून द्या. माझं मत वाया गेलं नसेल, अजूनही देश सुधारेल अशी आशा करतो. सगळे मिळून प्रयत्न करुया. स्वच्छ देश घडवूया”.
