Majjacha Adda with Atisha Naik : कलाक्षेत्रामध्ये काम करत असताना कलाकार मंडळींना विविध प्रश्नांचा सामना करावा लागतो. काम मिळवण्यासाठी कलाकारांचं सुरु असलेला संघर्ष व त्यादरम्यानचे अनुभव अनेकांनी ऐकले आहेत. आजही चेहऱ्याचा रंग किंवा बोल्ड भूमिकांना नकार दिल्यामुळे अनेक अभिनेत्रींच्या हातून भूमिका जातात. असाच काहीसा प्रकार अभिनेत्री अतिशा नाईकबरोबरही घडला आहे. याचबाबत तिने आता खुलासा केला आहे.
‘इट्स मज्जा’च्या ‘मज्जाचा अड्डा’ कार्यक्रमात अतिशाने हजेरी लावली होती. यावेळी तिने अनेक विषयांवर दिलखुलासपणे भाष्य केलं. दरम्यान अतिशाला “तू काळी आहेस म्हणून तुला भूमिका मिळाल्या नाहीत, चित्रपटासाठी तुला फार विचारणा होत नाही” असं विचारण्यात आलं. यावेळी तिने अगदी स्पष्ट शब्दांमध्ये उत्तर दिलं.
अतिशा म्हणाली, “इतर कोणाबरोबर काही घडलं तर मला दोन मिनिटांसाठी वाईट वाटतं. तुम्ही त्या व्यक्तीचं काम पाहिलं पाहिजे. का तुम्ही असं करता?. दुसरं म्हणजे माझे आई-बाबा सावळे होते. मी गोरी झाली असते तर माझ्या आईच्या चारित्र्यावर शिंतोडे उडाले असते. त्यामुळे माझं म्हणणं आहे की, मी काळी-सावळी जशी आहे तशी चांगली आहे. माझ्या शरीराचा जो रंग आहे त्यामध्ये मी खूश आहे. एकदाही मी गोरं होण्यासाठी कोणतीच क्रिम वापरली नाही. माझी आजी गोरी होती. पण मी कोणत्याच प्रकारचा भेदभाव करत नाही. मी काळी आहे की गोरी जर तुम्हाला नसेल आवडत तर तो तुमचा प्रश्न आहे”.
आणखी वाचा – “माझ्या मुलीला बघून एकाची लाळ गळत होती अन्…”, अतिशा नाईकचा खुलासा, म्हणाली, “छेड काढली…”
“बोल्ड भूमिकांसाठी अंगप्रदर्शन करणार का? असंही विचारण्यात आलं. पण माझे कुटुंबीय, माझा मित्र परिवार, त्यांचे आई-बाबा माझं काम प्रेमाने बघतात. अतिशा आहे तर आम्हाला दाखव ती नवीन काय करत आहे असं विचारतात. त्यावेळी त्यांना मला स्क्रिनवर बघताना मान खाली घालण्याची वेळ येऊ नये. पण अशाप्रकारचे सीन जे लोक करतात ते चुकीचे आहेत का? तर माझ्यामते नाही. त्यांना योग्य वाटतं ते करतात. मला ते योग्य वाटत नाही म्हणून मी करत नाही. पुढे कधी मला योग्य वाटलं तर असे सीन मी करेन. पण त्यापूर्वी बोल्ड सीन करणं खरंच भूमिकेची गरज आहे का? हे मी बघेन”. अतिशाच्या उत्तराने सगळ्यांची मनं जिंकली आहेत.