छोट्या पडद्यावरील मालिका म्हणजे मराठी प्रेक्षकांसाठी अगदी जिव्हाळ्याचाच विषय. नवीन विषय व नवीन आशय असलेल्या मालिककांचे प्रेक्षकांना कायमच आकर्षण असते. त्यामुळे एखाद्या नवीन विषय व नवीन जोडी असलेली मालिका पाहण्यासाठी प्रेक्षक कायमच उत्सुक असतात. अशातच आता छोट्या पडद्यावर काही नवीन मालिका सुरु होत आहेत. काही दिवसांपूर्वी अभिनेत्री स्पृहा जोशी व अभिनेता सागर देशमुख यांच्या प्रमुख भूमिका असलेल्या नव्या मालिकेची घोषणा झाली.
‘सुख कळले’ असं या नव्या मालिकेचं नाव असून ‘कलर्स मराठी’ वाहिनीवर ही नवी मालिका सुरू होणार आहे. काही दिवसांपूर्वी या मालिकेचा एक टीझर प्रेक्षकांच्या भेटीला आला होता. तेव्हा पासून या मालिकेविषयी प्रेक्षकांना उत्सुकता लागली होती. अशातच आता या मालिकेचा आणखी एक नवीन प्रोमोदेखील प्रदर्शित झाला आहे. ‘कलर्स मराठी’च्या अधिकृत इन्स्टाग्राम अकाऊंटद्वारे ‘सुख कळले’ या मालिकेचा नवा प्रोमो शेअर करण्यात आला आहे. यामध्ये स्पृहा, सागरसह मालिकेतील इतर अनेक कलाकारही पाहायला मिळत आहेत.
या नवीन प्रोमोखाली सुयश टिळक, सुकन्या मोने, शर्मिला शिंदे, प्रियदर्शन जाधव, समिरा गुजर आदी कलाकारांसह अनेक कलाकारांनी कमेंट्स करत शुभेच्छा दिल्या आहेत. तसेच अनेक चाहत्यांनीही या नवीन प्रोमोखाली कमेंट्स करत मालिकेबद्दल उत्सुकता दर्शवली आहे. या व्हिडीओखाली प्रेक्षकांनी “किती सुंदर प्रोमो आहे, खूपच छान, आम्ही उत्सुक आहोत, अगदी नवीन विषय आणि नवीन जोडी पाहायला मिळणार, खूप गोड आणि या भूमिकांसाठी स्पृहा व सागर हेच योग्य आहेत” अशा अनेक कमेंट्स केल्या आहेत.
दरम्यान, या प्रोमोद्वारे मालिकेची तारीख जाहीर करण्यात आली आहे. पण पण मालिकेची वेळ अद्याप गुलदस्त्यात ठेवण्यात आली आहे. अशातच कलर्स मराठीवर ‘इंद्रायणी’ नावाची आणखी एक एक नवीन मालिकादेखील नुकतीच सुरु झाली आहे. त्यामुळे आता स्पृहा व सागरची ही नवीन मालिका कोणत्या जुन्या मालिकेची जागा घेणार? कोणती जुनी मालिका संपून ही नवीन मालिका दाखवली जाणार? याची प्रेक्षक आतुरतेने वाट पाहत आहेत.